على عبد الحى : 6 ابريل وجناب المشير

بسم الله الرحمن الرحيم

نظرا للعديد من الظروض ترافق معها الأجواء المحيطة بالعمل الإعلامي في مصر و كذلك مع استمرار حجب محتوي المؤسسة عن الوصول للجمهور قررت إدارة مؤسسة البديل تعليق و تجميد موقع البديل و منصاته الإعلامية وإيقاف بث كافة أنواع المحتوي المرئي و المكتوب لحين إشعار آخر ونعتذر لجمهورنا ومتابعينا عن عدم قدرتنا علي الاستمرار في الوضع الحالي علي أمل العودة يوما ما إن شاء الله تعالي البديل ٢٢ إبريل ٢٠١٨

بسم الله الرحمن الرحيم

نظرا للعديد من الظروض ترافق معها الأجواء المحيطة بالعمل الإعلامي في مصر و كذلك مع استمرار حجب محتوي المؤسسة عن الوصول للجمهور قررت إدارة مؤسسة البديل تعليق و تجميد موقع البديل و منصاته الإعلامية وإيقاف بث كافة أنواع المحتوي المرئي و المكتوب لحين إشعار آخر

ونعتذر لجمهورنا ومتابعينا عن عدم قدرتنا علي الاستمرار في الوضع الحالي علي أمل العودة يوما ما إن شاء الله تعالي

البديل ٢٢ إبريل ٢٠١٨

 

لما تيجى تشوف الأوضاع حواليك فى مصر كل يوم بتميل إلى الأسوء تأكد إن القادم أفضل
ممكن تلاقى الدنيا فيها شويه لخبطه زى مثلا الإعلام المصرى زي ما هو قبل الثورة نفس البقين بتوعه بعد الثورة
حتى المشاكل هى هى غير بس معدل الجريمه نزل شويه.. وأمن الدوله هادى اليومين دول رغم إنى عارف أنه لسه شغال
وفى شويه حريه حتى سعيد عضمه اللى كان بيخاف من عمى اسماعيل المخبر بتاع المنطقه بقى بيتكلم فى السياسة يسمع الكلام فى التلفزيون بالليل وينزل يعيده على الناس على القهوة الصبح ..
لكن لما تيجى تتكلم عن الثورة نفسها ومجريات الاحداث فيها ابتداء من جمعه الغضب الثانية
إلى جمعه الحسم اللى ماحسمتش أى حاجة خالص هاقولك إن الشعب المصرى هو نفسه بيعمل ثورة دلوقتى ضد نفسه يعنى تخيل إنك أنت الثورة وأنت الثورة المضاده !!
يعنى لما تلاقى المجلس العسكرى بيتهاجم بضرواة وخاصة فى الفترة الأخيره اعرف إن فى شئ مش صح .
يعنى لما تلاقى حركه 6 ابريل بيشكك فيها من البعض وبيدافع عنها البعض رغم أن حركة 6 ابريل دى من ضمن الحركات اللى أشعلت فتيل الثورة وتاريخها معروف للجميع ولكن عليها علامات استفهام كثيرة!!! برضوا اعرف ان فى شئ مش صح .
لما المجلس العسكرى يتباطئ الى حد التواطئ فى محاكمات رموز الفساد برضوا يبقى أكيد فى شئ مش صح .
لما ميدان التحرير يبقى هو الشرعية الوحيدة اللى بتتكلم باسم الشعب وباقى الشعب غرقان فى المشمش برضوا يبقى فى شئ مش صح .
لما تلاقى وزير الداخليه يطلع ويقول إن مافيش عنده قناصة وهو عنده جو وفى الآخر مايتغيرش فى التغير الوزارى الجديد . يبقى فى شئ مش صح .
لما المجلس العسكرى يدير البلد وهو لايفقه شئ عن الإدارة المدنية ومصمم إن قرارته تكون قرآن أنزل لابد العمل به وما يسمحش لنفسه إنه يختار مستشاريين مدنيين ممن يتمتعون بثقه لدى غالبية الشعب حتى تعود الثقه بين المجلس والشعب .تاكد ان فى شئ مش صح
ولما تلاقى معظم الحركات الوطنيه والحقوقية فى مصر بتتمول من الخارج فى عهد مبارك ويستمر التمويل ليها حتى بعد مبارك برضوا يبقى فى شئ مش صح .
لما يحصل اكتر من مرة محاوله للوقيعه بين الشعب والجيش لكى تتحول دفة الأحداث مثل التى تدور فى سوريا واليمن ولبيا . يبقى فى شئ مش صح

لما تلاقى 400 ائتلاف للثورة و500 حزب بعد الثورة وكل ائتلاف ينشق منه 10 ائتلافات معتصمين فى ميدان التحرير وتيجى تتكلم معاهم تكتشف إن معظمهم وصل الميدان بعد تنحى مبارك . يبقى أكيد فى شئ مش صح
لما المجلس العسكرى يصر على أنه يكلم الناس باستعلاء وكبرياء وبلغه التهديد ويرفض حتى إنه يفكر فى إيجار شركة علاقات عامة تتحدث بالنيابة عنه لتحسين صورته قدام الشعب زى ما مبارك كان مأجر شركة علاقات عامة أمريكية بكام مليون دولار فى الشهر علشان تحسن صورة مصر قدام العالم الغربى يبقى فى شئ مش صح
لما تسمع إن الحكومة كل يوم تقولك عجلة الإنتاج واقفة وعايزين نشتغل والكلام الفاضى ده رغم إن كل الناس شغاله والعجلة إن كانت واقفة فهى واقفه من 60 سنة من أيام مابقى القطاع الخاص عام ورجعوا خصخصوه تانى.
واللى يحب يعرف إن مصر عمرها ماهتقف فيها عجلة أبدا ولا هاتريح يرجع للقرآن ويقرأ قوله تعالى على لسان سيدنا يوسف (:”قال اجعلني على خزائنِ الأرض إنّي حفيظٌ عليم”.) الآية 55 من سورة يوسف ..لم يقل يوسف (عليه السلام ) اجعلنى على خزائن مصر ولكن خزائن الأرض لعلمه بأن مصر فيها من الخيرات مايكفى
لكن لما تلاقى الملجس كل يوم عمال يتكلم عن العجلة والحكومة تقول العجلة ريحت وعايزه زقة وعلى رمضان الناس هاتجوع !!ورغم كده فاضل على رمضان 9 أيام والناس لسه عايشه والبلد ما أفلستش ولا حاجة. يبقى أكيد أكيد فى حاجات مش صح بتحصل.

وعلشان نعرف الحاجات دى أولا لازم نفكر الأ ول ونعمل العقل قبل ما نعمل العاطفة.
مصر مستهدفة وده مش جديد عليها وبدليل إنها فى عهد مبارك بقت تراجع دورها القيادي والسياسي للعدم تقريبا رغم إن تاريخها أقدم تاريخ وحضارة عرفه البشرية وإلا بقى اللى أخدناه فى المدارس ده كان كلام فاضى

 .علشان كده لازم نركز شويه فى كل اللى بيحصل حوالينا ونبطل السؤال السخيف اللى بيتكرر كتير
هى دى ثورة؟ ولا مش ثورة ؟

وأهم حاجه نبطل نسمع كلام الإعلام الفارغ والقنوات الهابطة سواء الاعلام المصرى أو الإعلام الخاص اللى هدفه الفرقعة الإعلاميه وأصبح كل الإعلاميين والقنوات مع الثورة واللى يدخل على اليوتيوب هايشوف بلاوى قبل الثورة للإعلام الخاص

 .ولأن الإعلام يعتبر من أخطر الوسائل اللى الجمهور بيستسقى منها معلوماته فأي فرقعة بنصدقها وبنرددها زى البغبغوات وخلاص ومابنتأكدش من مصدر الخبر وده فى أوقات كتير بيودي فى داهية … ربنا يبعدنا عنها
تانى حاجه بقى لازم نعرف إن مبارك مش هيتحاكم حتى لو شدينا فى شعرنا وقلبنا المجلس وقعدنا فى التحرير من غير هدوم زى ما الدعوات على الفيس بوك قالت ..
ليه بقى مش هيتحاكم ؟ لأن المجلس العسكرى مع كامل احترامى له يكن بالعرفان والتقدير لصاحب الضربه الجويه الأولى والتانيه وال15 ورئيس كل حاجة فى البلد الحج مبارك
عشان كده ممكن يحصل حاجه من الاتنين ؟
لاما الشعب يخبط دماغه فى الحيط !!
لاما مبارك هايخاد حقنه هو ويموتوه أو حتى هو يموت ويريحنا !! أو يطلع الصندوق بتاع الجنازة فاضى وكأنهم بيقولوا إنه مات وهما بيضحكوا علينا ومقعدينه فى شرم بيستجم مع العصافير .. ثالثا بقى المجلس العسكرى ماينفعش يمشى دلوقتى لعدة أسباب ؟؟
أهمها أنه هو حامي حمى الثورة زى ما إحنا قولنا إن الشعب والجيش إيد واحدة ولا أنتوا عيال بترجعوا فى كلامكم .
وأنه هو المجلس العسكرى وفى نفس الوقت اللى ماسك الجيش وبيتحكم فى الحكومه بصفته الرئيس يعنى بيدير كل حاجة
يعنى من الاخر هو المؤسسة الوحيده فى مصر اللى تقدر تقود فى المرحلة الراهنه على الأقل ماحدش هايشكك فى وطنيته وبرضوا مش هننكر إن فى تجاوزات لكن وقوفه مع الثورة وهذا واجبه وليس جبايه منه علينا، فده شئ نقدره ونحترمه علشان كده لازم نستحمله وبعد ما المرحله دى تعدى يبقى نشوف هانعمل إيه .. لان الاعداء فى الشمال والجنوب والشرق والغرب عاملين زى الصقر لأن كل واحد فيهم مستنى ياخد حته من الدبيحة بس مستنين لما تقع .. وإن شاء الله مش هايحصل .
وده طبعا مايقللش من إن المجلس العسكرى أخطا خطأ فادح لما سمح لنفسه إن يمسك البلد علشان ينقذها .. وهو بالفعل أنقذها لكن للأسف رمى العومات وساب الشعب يوصل للشط براحته مايعرفش إن الميه مالحه وفيه سمك قرش بياكل فى البشر
وإن أهالى الشهداء مازلوا يجئرون والقتله فى طرة ينعمون …

وكما قال لى صديق ( ان المجلس العسكرى ربنا يكرمه عرف مين ورا 6 ابريل برة مصر لكن معرفش مين ورا القناصه اللى جوا مصر )

وفى الختام بقى عايز أقول حاجة اللى حابب يروح روكسى وياخد لقب الفلول روح روكسى تناديك اجرى
واللى عايز يروح التحرير يروح ويحصل على لقب بلطجي أهلا بيك برضوا التحرير محتاجاك

 وفى النهايه لاتحزن ياعزيزى فكلنا فـــــــلول!!!

ربنا يديمها نعمه ويحفظها من الزوال ورمضان كريم